Aaati Raha Karo Naani

Yaad hai Naani

Tumhari Chhakuli wali kavita bhi …hostel, school  ke kisse bhi

Bhaiyon ki pehelwani bhi , tumhare  jhumko wali kahani bhi

Tumhari  bachpan ki saheli ka naam bhool gai hu

Yaad hai Naani

tumhari gunjti hui hansi bhi …aur chashme ke peechhe se behte aansu bhi

Saani se sane haath bhi …aur cotton ki crease wali saari bhi

Tumhare balon ke juda banane ka tarika bhool gai hu

Yaad hai Naani

chakki ki daru bhai daru bhi, dahi namak chawal ka swad bhi

gud moongfali  ki chikki bhi, maheri  aur kesari meethe chawal bhi

Tumhare special rawa cake ki recipe bhool gai hu

Sapne mein hi sahi …Aaati raha karo Naani

Abhi toh kuchh kahaniyan yaad bhi  hai…

Saare kisse bhool gai  toh Naani bhi 

ek rishte ka naam bankar reh jayega...

Ek jaise ho tum dono

Tumhari Yaadein bhi tumhaari tarah hain..

Jaati Aati rehti hain...

Thak jaaoge ..tham kyun nahi jaate tum dono...

Ya chale hi jao ....ya chain se Baitho ...Saans hi lelo

Vaise Koi ....Manaahi nahi hai tumhaare aane ki

bas kuch kar sako toh yeh karna ...

Ab Aao toh aise aana ... ki ye fikr na rahe ki...

Haath chhoot toh nahi raha  ..... koi rooth toh nahi raha

Aakar jaane  aur  jaakar aane ki aadat daal di hai tumne

Har baar Bikharkar Uthna ...Mera Riwaaz ho chala hai

Khush rehna Fitrat hai meri..isilye aasani hai tumhare liye bhi 
Kyunki ye jaante ho na tum...kitne din ladegi apni hi Taaseer se

Bhool jaane ki Umeed toh nahi hai ...ki Koi aaya karta hai....

Phir ek baar mujhe Insaan banakar....... jaane ke liye ....